Ciberseguridade

A recollida de información pode facerse consultando tanto a información do equipo como os programas instalados, arquivos de configuración, historial de navegación, e toda outra información que pode ser relevante tanto para proporcionar información sobre os hábitos e gustos dos usuarios para obter un beneficio comercial a partires desa información ou ben obter información para roubar a identidade do usuario e suplantalo cometendo calquera clase de delitos ou fraudes.

Algúns programas espía incorporan funcionalidades que rexistran as teclas pulsadas, o que se da en chamar keyloggers. Este rexistro permite obter contrasinais e outros datos sensibles, xa que os vai almacenando xunto coa páxina visitada permitindo así obter os datos de acceso. A perda deste tipo de contas en sitios críticos como banca ou tendas online pode derivar en perdas económicas ou mesmo chegar a cometer delitos suplantando ao usuario lexítimo.

Hai que ter en conta que nunha inmensa maioría dos casos este software require da intervención da persona usuaria para a súa instalación e propagación. É dicir, non aparecen de repente, senón que os instalamos de xeito involuntario, engánannos dalgunha forma para facilitar a súa instalación no noso dispositivo. Os xeitos máis habituais de propagación coa intervención da persoa usuaria son:

• A través do correo electrónico.

• A través de aplicacións de mensaxería como arquivos adxuntos.

• Instalando un programa descargado de Internet ou de fontes P2P.

Ademais existen outros xeitos de propagación sen a nosa participación como poden ser:

• Buracos de seguridade no hardware de comunicación como routers, ou dispositivos de almacenamento como chaves USB (pendrive) e en sistemas operativos que permiten a instalación de programas por parte de terceiros de maneira remota.

• Buracos de seguridade en programas como navegadores, xestores de correo e outros similares que por falta de actualizacións de seguridade permiten a instalación de programas de terceiros de maneira remota.

• Directamente a través da conexión a Internet se o hardware de comunicacións ou o noso dispositivo non conta con medidas de seguridade axeitadas. Os programas destinados a protexer as comunicacións que se fan a través dos dispositivos denomínanse devasa (Firewall).